Galauda comeza o curso 2011-2012 coa participación de catro institutos cataláns de Ensino Secundario.
Este ano incorpórase un novo instituto: o INS La Sedeta (Barcelona), que lles ofrecerá a 60 alumnos a oportunidade de estudar a lingua e a cultura de Galicia dentro das súas horas lectivas. Dámoslle, pois, a nosa máis calorosa benvida e agardamos que gocen desta nova experiencia. Por outra parte, temos que nos despedir do INS Sant Just Desvern, que deixa de colaborar co proxecto pola xubilación da profesora Celsa Nogueira.  Agradecémoslle á súa profesora todo o inmenso traballo e entusiasmo que dende os primeiros anos puxo no proxecto e esperamos seguir contando coa súa colaboración en tarefas de Galauda.

Neste curso académico, como vén sendo habitual, ademais do labor diario do profesorado e do alumnado, realizaranse diversas actividades pensadas para pór en práctica a lingua máis alá das aulas. Entre outras, faremos unha visita aos lugares galegos emblemáticos de Barcelona e unha viaxe a Galicia, e participaremos no concurso literario Contos do Mediterráneo e no Saló del Còmic de Barcelona co noso fanzine O Catalizador. Aprenderemos e pasarémolo moi ben.
A comunidade educativa catalá tamén pode coñecer o noso proxecto a través a páxina do xtec.